Sjoerpapier

Dit schrijven ze over zichzelf op het hoesje van de CD:

Örges in 2006 is de eerste sjtein gelag veur dees CD; bienao drie jaor zeen veer, mit heel grote tössepoze, bezig gewaes mit ’t vasligke van oos muziekale passie en de tekste van Chris. In woonkamer, kelder en sjuur is edere track net zolang gepolies en gesjoerd toetdet ’t ’n ech Sjoerpapier-nummer waas.

Mit valle en opsjtaon, väöl plezeer en menige diskussie is get óntsjtaon wo-in leefde veur meziek, Remunj en ’t remunsj dialekt, humor, herkinbare dagelikse gebeurtenisse en emosies noa boete kómme.

De nummers vertelle verhaole oet ’t laeve in en óm de sjtad Remunj, netuurlik in ’t Remunsj want veer zeen alle-veer gebaore en getaoge in dees sjtad. Zo vertelt ‘Van de Roer in de Maas’ euver ’t verangerende gezich van de sjtad.

In ‘Waat eine kraom’, ‘Langs de autobaan’ en ‘De maf’ waert de realieteit besjreve van ’t laeve in eine waereld óm ós haer dae sjteeds helder en aafsjtenjelikker waert.

Bliej en vol humor zeen de nummers ‘Janse’, ‘Trek maar ein nummerke’ en ‘Feertig’.

‘De vastelaovesgek’ is ein ode aan de Limburgse vastelaoveskultuur en bringk ’t echte vastelaovesgeveul van eine vastelaovesgek nao boete. Veur alle vaders mit dochters is ‘Doe en ich’ gesjreve. ‘Same noa boete’ tensjotte, is veur Chris zien vader en ederein dae óngewild in ein verzorgingshoes terech kump.

In 2001 brach Sjoerpapier al ’n single oet:

‘Langs de iezere Rein’, gemaak in opdrach van de gemeintes Remunj en Roerdalen as protesleedje taege de heringebroekname van ’t historische treintracé. ’t Thema is noe in 2009 nog sjteeds aktueel. Oet resjpek veur de volharding in ’t gevech van alle protesgroepe höbbe veer det nummer als bonustrack op dees CD gezat.

Dees CD drage veer op aan ós ajers die veer dankbaar zeen, det zie ós häör muziekale gene höbbe euvergedrage.

’n Gedeilte van de opbrings van de CD kump ten goede aan de Stichting Kultpub die Remunsje kultuur veur ederein toegankelik probeert te make.